Бүсгүйн Тэмдэглэл

Уржигдар орой Яахоогийн нүүр хуудсан дээр энэ хоёр мэдээ зэрэг гарсан байлаа.

Цаг хугацаа зогссон байсан мэт...

10 гаруй жил алга болсон хайрын захидал нь салсан хосуудыг 16 жилийн дараа ахин нэгтгэв. Стив Смит, Кармен Руйз Перез хоёр 17 жилийн өмнө Карменыг солилцооны оюутан болж өмнөд Английн Бриксхэмд суралцахаар ирэхэд нь танилцаж, дурлалцжээ. Жилийн дараа хосууд гэрлэхээр шийдэж сүй тавьсан ч удалгүй Карменийг өмнөд Франц руу явах үеэр хосуудын харилцаа бүтэлгүйтэж салжээ. Өөрсдийн хайр дурлалыг дахин сэргээнэ гэсэн итгэлийг тээсээр хэдэн жилийн дараа Смит сүйт бүсгүйдээ эцэг эхийнх нь гэрийн хаягаар Испани руу хайрын захидал илгээжээ. Харин тэр үеэр эцэг эхийнх нь гэрт засвар хийж байсан барилгын ажилчин захиаг нь камин зуухны ард тавиад мартчихсан байж. Хэдэн жилийн дараа камин зуухны араас захиагаа олсон Кармен сэтгэл догдлолоосоо болоод тэр дороо хайртай залуу руугаа утасдаж чадаагүй гэдэг. Гэхдээ удалгүй Кармен Стивтэй холбоо барьж, уулзахаар болжээ. Бид дахин уулзахад цаг хугацаа зогсчихсон байсан юм шиг л санагдсан хэмээн сүүлд нь Стив ярьжээ. Бидний уулзалт яг л кино шиг байсан, Нисэх буудал дээр бид хоёр бие бие рүүгээ гүйж, бие биеэ тэврэн авсан. Бид тэр дороо л бие биедээ ахин дурласан, хоёр биенээ 30 секунд хараад л үнсэлцсэн хэмээн хосууд ярьжээ. Өнгөрсөн долоо хоногийн баасан гаригт хосууд гэрлэжээ.

Бөөрний төлөөх хурим

Донор бөөртэй болохын тулд нэгэн араб эр филиппин бүсгүйтэй гэрлэжээ. Ингэснээрээ тэрээр хүний эд эрхтэнг худалдаалахын эсрэг батласан филиппиний хуулийг тойрч гарахыг эрмэлзсэн бололтой. Манилагийн нэгэн нийгмийн халамжийн төвийн ажилтны мэдэгдсэнээр уг араб эр бөөрөө солиулахаар эмнэлэгт хандсан бөгөөд шинэхэн эхнэр филиппин бүсгүй нь сайн дураараа бөөрөө нөхөртөө өгөх хүсэлт гаргасан байна. НХ-н (нийгмийн халамжийн) төвийн ажилтнуудыг гайхширалд оруулсан явдал нь, уг араб эр англи болон тагалогоор (филиппинчүүд албан ёсны англи хэлтэй, тагалог нь үндэсний хэл) ярьж чаддаггүй, харин эхнэр нь араб хэл мэддэггүй байжээ. Уг мэс заслийг хийхийг мэдээж хориглосон байна. Филиппин улс нь хүний эс эрхтэн наймаалах бизнесээрээ дэлхийд тэргүүлэх байранд явдаг бөгөөд нэгдүгээр байранд Хятад улс ордог байна. Филиппин улс хүний эд эрхтэнг наймаалахын эсрэг хуулиа өөрчилж чангатгасан ч эд эрхтэнг худалдаж авах гэсэн баян гадаадын иргэдийн тоо төдийлөн буураагүй байгаа юм байна.