Бүсгүйн Тэмдэглэл

Орой Ebay-гээс хэдэн ном хармаар санагдаад, статистикийн номнууд харж байгаад 2-3 ном худалдаад авсан чинь amazon.de дээр зарим нь хямдхан байдаг гэнээ. Ингээд л нэг юм харахаар нөгөөхөөр нь шалгахаа мартчихаад байх юм. Онлайн худалдаа гэдэг юм учиргүй хөгжсөний "гайгаар" нэг газар X үнэтэй байгаа юмыг нөгөө газраас 2X үнээр худалдаад авчих эрсдэл өндөр болж. Амазон дээрх нь хуучин нь л даа, гэхдээ ном бол хуучин байсан ч яахав, хамгийн гол нь хуудас нь бүтэн байх нь чухал. Би нэг удаа 30 гаран евроны номыг хуучин нь 9.95€ гэж байхаар нь худалдаад авсан чинь хавтасан дээр нь нэг хар зураас гарснааc бусдаар шив шинэ ном байсан юм даг. Өө бас ирэх семестерт хэрэг болж магадгүй ганц нэг программаа нетээс олж нөүтбүүкэн дээрээ суулгаж авлаа. Тэгж явах замдаа англи хэлний хэдэн ном татаад авав. Янз бүрийн л өргөтгөлтэйгээр олж аваад ямар ч байсан бүгдийг нь задлаад, суулгаад авав. Файлуудыг конвертлодог янз бүрийн програмууд ч сайхан юмаа гэснээс онлайн хулхидалт гэдэг юм бас л их газар авч байна шүү.

Өөрт тохиолдсон зүйлээ яръя л даа. Дээхнэ дээ, хэрэг болоод Adobe Flash Player татаж ававаа. Нэг газраас татаж авах гэсэн чинь өөдөөс хаяг, e-mail хоёр асуухаар нь уг software нь тэртэй тэргүй үнэгүй юм чинь гэж бодоод санаанд ч оролгүй, үнэнээр нь бөглөөд, прог-аа татаад авчихсан юм. Харин гэтэл маргааш өглөө нь нөгөө газраас майл ирдэг гэнээ. "Өө танд баяр хүргэе. Та манай  software-sammler.de- тэй хоёр жилийн гэрээ хийлээ. Таны хаяг: бла бла, та хоёр жилийн гэрээний төлбөр 96.00€ -гоо .... данс руу явуулна уу бла бла". Намайг ёстой "баярлуулна" биз дээ. Би тээр доод талын хажуу буланд жижиг саарлаар бичсэн гэрээг нь уншилгүй ОК дарчихаж л дээ. Тэр доор нь нэг найз руугаа "Би ингэчихлээ яах уу" гэсэн чинь нөгөөх маань намайг баахан загнаж, уг газрын талаар нетээр хайж байгаад "Санаа зоволтгүй, наад газар чинь угаасаа интернетээр хүмүүсийг хулхиддаг юм байна. Мөнгийг нь битгий төл, битгий тоо" гэлээ. Тэгээд таг мартчихсан явж байсан чинь хэд хоногийн дараа нэг өмгөөлөгчийн газраас ахиад шуудангаар захиа ирэвээ. "Та энэ бла бла гэдэг газар төлөх ёстой 96€-гоо төлсөнгүй, одоо та эдний төлбөр болон өмгөөлөгч миний төлбөртэй нийлээд 138€  төлнө үү, Өмгөөлөгч Олаф Танк бла бла" гэсэн захиа ирэв. Би ч энэ удаад нь гэнэдсэнгүй, тэр дор нь нетээр хайсан чинь мань хулхи өмгөөлөгчийн талаар ТВ-ийн нэвтрүүлэг, энэ өмгөөлөгчөөс төлбөр төл гэсэн захиа авбал төлж болохгүй гэсэн сэрэмжлүүлэг зэрэг мэдээллийг хангалттай олж санаа амраад, нөгөө захиаг нь хэдэн хэсэг ураад хогийн саванд шидчихсэн. Бас өөрийгөө хэрэглэгчийг хамгаалах төв ч билүү нэг тийм газар бүртгүүлж авав. Харамсалтай нь ихэнх хүмүүс өмгөөлөгчөөс бичиг авангуутаа сайн судалж үзэлгүйгээр айсандаа болоод нэхэмжилсэн мөнгийг нь шилжүүлчихдэг байна. Ийм маягаар мань өмгөөлөгч болон, үнэгүй software дундаас нь зарагч нөхөр зэрэг хулхи хүмүүс саятан шиг л хангалуун амьдардаг байна. Сайны хажуугаар саар гэж. Манайд бол иймэрхүү юм өдийдөө байхгүй байх л даа, гэхдээ юм хөгжихын хэрээр сайн муу юм гарч ирэх л байх даа.

За ингээд уул нь шинэ семестерийн бэлтгэлээ хийлээ гэх гэж байсан бичлэг маань онлайн хулхидалтаас сэрэмжлүүлэх бага хэмжээний "гарын авлага" болоод явчихваа. Хичээлтэй холбоотой байж магадгүй ганц нэг ном, программуудаа цуглуулаад, дараа семестерийнхээ планыг гаргаж, баахан асууж сураглах юмаа хамтатгаад проф-доо уртаас урт майл бичиж авав. Дараа долоо хоногоос сургууль дээр болох янз бүрийн курсүүдэд суух байх даа. Хичээл эхлэхтэй зэрэгцээд ажилд орох ярилцлагад яаж бэлдэх вэ, ажил яаж олох вэ энэ тэр гэсэн курсүүдээс эхлээд төрөл бүрийн хэлний болон software-н үнэгүй курсүүд сургууль дээр явагдаж эхэлдэг. Энэ курсүүдэд эртхэн л бүртгүүлэхгүй бол хугацаа нь дөхөхөөр сул суудалгүй болчихдог юм. Зуны семестерт бараг юм хийлгүй, амарч цэнгэх, наргиж зугаацах тал дээр ихээхэн анхаарал хандуулсныг хэлэх үү, нэг хэсэгтээ нормондоо орохгүй балардаг юм болуу.   

Гэснээс бичлэгээ оруулах гэсэн чинь Банжиг гацжээ гэжжж. Өглөө ажлын цаг эхлэхээр хүмүүс шууд л блог руугаа шуурдаг юм болуу гэж бодов. Одоо яг 10.00 болох гэж байна Монголд. Хадгалаад, унтаж сэрээд оруулий даа.

10.14. Түр гацалт байж... ккк