Бүсгүйн Тэмдэглэл

... Өрөөний булангийн ширээн дээр аварга том цэцгийн баглаа харагдана. Яг л одуудийн хувцас солих өрөөнд байдаг шиг. Цэцэг хүлээж авсан бүсгүй инээмсэглэн "Нөхрөөс маань... Манай хүн байнга ингэдэг юм...". Хажууд нь зогсох найз бүсгүй нь дотроос нь өөрийн эрхгүй огших атаархлаа дарахыг хичээxийн сацуу найз бүсгүй нь энэхүү үйл явдлыг байдаг л юм шигээр хүлээн авч буйд гайхна. Гайхах юмгүй, тэр долоо хоног бүр л нөхрөөсөө ийм цэцэг авдаг. Харин өөрөө? Хамгийн ихдээ л хэдэн сардаа нэг, эмэгтэйчүүдийн баяраар, төрсөн өдрөөрөө... Бас найз бүсгүйнх шиг нь ийм том улаан сарнайн баглаа биш, голцуу нэг юм уу гурван ширхэг сарнай...

"Би түүнээс хамгийн сүүлд хэзээ цэцэг авлаа?" хэмээн бүсгүй өөрөөсөө асуулаа. Өөрөө ч мартсан байхыг бодоход сүүлийн цэцэгнээс хойш нэлээдгүй удаан хугацаа өнгөрсөн бололтой. Өөрийн эрхгүй гомдол төрөх шиг болно... Орой нь тунирхангуйгаар түүнээс "Чи яагаад хэзээ ч надад "би чамд хайртай" гэж хэлдэггүй юм?" хэмээн асуув. "Би чамд хайртай шүү дээ" хэмээн залуу өөрийгөө өмөөрлөө.

- Тэгээд ч мэдээжийн юмыг би чамд байн байн дахин давтан хэлэх хэрэг байна уу? Би чамд хайртайг минь чи өөрөө мэдэрч чадахгүй байна гэж үү?

- Чи тэгвэл зүгээр хэлчихэж болдоггүй юм уу? хэмээн бүсгүй үг сөрлөө. "Тэгээд ч чи надад цэцэг ч болтугай өгдөггүй биз дээ." Эхэндээ тэр байнга шахуу л цэцэг өгдөг байсан. Хайртайгаа ч олон янзаар илэрхийлдэг байж. Бүр бүсгүйд зориулан шүлэг хүртэл бичиж байлаа.

Зарим нь бүсгүйнхээ дээрээс цэцгэн бороо асгаруулж, ФМ-ээр хайрын зурвас илгээн, дуу түүндээ зориулж, зарим нь гэрийнх нь үүдэнд лаагаар зүрх хийн асааж, түүнийг хэмээн зүрх нь шатаж байгаагаа илэрхийлнэ. Ямар романтик гээч... Харин дараа нь бүгд гайхаж эхэлнэ, хэрэв бүсгүй нь ийм хайрын бэлэг дахин дахин авахыг хүсвэл... Учир нь олдохгүй эрчүүдээ гэж.

Гэхдээ учир нь юу гээч! Дийлэнх эрчүүд ийм зүйлийг олон дахин буюу удаан хугацаагаар хийдэггүй, xэрэв чи нэгэнт түүнийх болсон бол, нэгэнт чи түүний хайр сэтгэлийг хүлээн авсан бол. Өөрөөр хэлбэл романтик хайрын бэлэг өгөөд байдаггүй, байн байн хайртай гээд байдаггүй. Юу мэдэрч буйгаа, өөрийн мэдрэмжээ үгээр илэрхийлэн гаргаж хэлнэ гэдэг эрчүүдийн хувьд эмэгтэйчүүдээс хүнд байдаг. Гэхдээ энэ нь эрчүүд бүсгүйчүүдэд "талтай" байгаагаа харуулахыг хүсдэггүй гэсэн үг биш. Тэд үүнийгээ үгээр биш үйл хөдлөлөөрөө харуулахыг хичээдэг. Өөрөөр хэлбэл хайртай гэдгээ хэлэхийн оронд хайртайгаа харуулахыг эрмэлздэг. Чамд хайртай эр хүн чамайг гуйхад өөдөөс чинь ямар нэгэн тайлбар тавихын оронд шөнийн дэлгүүр лүү яваад чиний идэхийг хүссэн маруужинг авчирч өгнө. Машины чинь тормосыг засаж, дугуйных нь хийг нь шалгана. Чиний аюулгүй байдлын төлөө. Ажлаасаа оройтоод харихад чинь автобусны буудал дээр чамайг хүлээгээд зогсох ч түүнд хэцүү биш. Чи түүнд ямар үнэ цэнэтэй, утга учиртай гэдгийг мэдрүүлэхийн төлөө тэр энэ бүхнийг хийдэг. Тэр цагаан морьтой ханхүү биш, харин чиний үнэнч хамгаалагч. Ямар ч эр хүн хайртдаа өөрийнхөө мэдрэмжийн тухай ярихын оронд түүнд хайртай гэдгээ харуулахын тулд өдөрт хэдэн ч удаа хамаагүй машины чинь дугуйг солихыг илүүд үзнэ.

Харин хүүхнүүд хэрэв хайрт нь түүнд хайртай гэж хэлбэл энэ бүхнийг хийж байгааг хараад баярлахаас хэд дахин илүү баярлана. Найдвартай машинтай гудамжаар аюулгүй явахыг хүсэхээсээ илүүгээр асар том улаан сарнайн баглааг хайрын илэрхийлэл болгон өгөх ханхүүг хүснэ. Мэдээж хайрт нь түүний төлөө юу хийж байгааг хараад хайртайг нь хэлүүлэлгүйгээр ойлгодог, баярладаг эмэгтэйчүүд байлгүй яахав. Гэхдээ л тэд хэзээ ч үүний төлөө цэцэг аваад юм уу, хайрын шүлэг сонсоод баярлахын дайтай баярлахгүй. 

Эрчүүд бүсгүйчүүдийн аль аль нь өөрийгөө байгаа чигээр нь нөгөөдөө хүлээн зөвшөөрүүлэхийг оролдох нь хоорондын харьцаанд хэзээ ч тус болдоггүй. Тэгэхээр эрчүүд минь хэдий хүсдэггүй, ам чинь эвлэж өгөхгүй, хэт нялуун, хүүхэд шиг санагдаж байлаа ч хамаагүй хааяа хааяа хайртдаа "үгээр" хайраа илэрхийж сурах хэрэгтэй. Харин хариуд нь бүсгүйчүүд өөрийгөө эрчүүдийн оронд тавьж тэдний толгойд юу эргэлдэж байдгийг ойлгохыг хичээх ёстой. Өөрөөр хэлбэл тэр хайрын баталгаагаа хаана нуусан, тэр газраас нь нь хай: машиныxaa дугуйнд, шөнө дунд маруужинд явж өгөхөд нь, харанхуй үдэш буудал дээр чамайг хүлээгээд сууж байдагт нь... Бас эрчүүд юуг хамгийн сайн мэддэг гээч, чи өөрийн мэдрэмжийн тухай гайхамшигтай урнаар ярьж чаддаг ч дугуйгаа хийлэх тал дээр бол таван настай хүүхэд шиг арчаагүй. Бас тэр цэцгийн баглаа чинь ажлаасаа оройтоод харанхуй гудамжаар ганцаараа айж явахад айдсыг чинь дарж, хажууд чинь байж хань болж чадахгүй гэдгийг мэддэг.

... Хэн мэдэрч чадахгүй байна, тэр сонсохыг хүсдэг. Бас харахыг... Зарим нь ойг тэр чигээр нь цэцэгс болгон хардаг... Моднуудыг хардаггүй...

...Нөгөө цэцгийн баглаан дунд, нөгөө атаархал төрүүлж, гоморхол, тунирхал дагуулж чадсан цэцгийн баглаан дотор, хэний ч нүдэнд харагдамгүй шахам дунд хэрд нь гоёмсог гэгчийн цаасан дээр бичсэн зурвас "Хайрт минь уучлаарай, би ахиад л оройтох нь. Чи захиалсан ширээгээ буцаагаад өгчихөж чадах уу? Намайг хүлээх хэрэггүй. Чиний Х." Цэвэр агаар оруулахын тулд бүсгүй цонхоо томоо гэгч нь нээлээ. Цэцэгнүүд толгой өвдөм дэндүү хурц үнэртэж байлаа...

Эх сурвалж www.sueddeutsche.de . Заримыг нь өөрийнхөөрөө "монголчилж", өөрийн бодлоо дээр нь нэмсэн болно.